Diario Vasco

Futbol talde nagusiak 2-0 galduz eta txartel gorri batekin ekin dio igoera faseari

  • Jubenilek bana bukatu zuten Oriokoren aurkako neurketa Eztalan Jon Mataren golari esker

Garaipen barik hasi dute igoera fasea Antzuola Kirol Elkarteko futbol talde nagusiak zein jubenilak. Orain arteko ligan hamabi partidatik bakarra galduta ziren Erregionalekoak, baina igandean Billabonak 2-0 hartu zituen mendean Arratzaingo belar artifizialezko zelaian. Etxean aritu ziren gazteagoak Oriokoren kontra eta berdinketarekin bukatu zuten.

Lehen zatiko 34. minutuan Iker Gardokik txartel gorria ikusi zuenean, aldapan gora jarri zitzaion neurketa Igor Larreak zuzendutako taldeari. Hamahiru minututan bi hori atera zizkion epaileak, aurkari bat zangotrabatzeagatik biak.

Ondorioz, hamar lagunekin geratu ziren bisitariak. Saiatu ziren berdinketari eutsi eta erasoren bati etekina ateratzen. Alferrik. Arauzko denbora betetzeko hemeretzi minutu falta zirenean, 71.ean, Billabonak bere lehen gola sartu zuen. Gora egin zuten antzuolarrek, 89.ean, ia bukaeran, bigarrena jaso arte.

Datorren zapatu arratsaldeko lauretan Mutriku hartuko du Antzuolak Eztalan.

Jubenilak 1-0 aurreratu ziren Jon Mataren golari esker lehen zatiko azken minutuan. Ordurako Aiert Kerexeta zelaia lagata zen orkatilan min hartu ondoren. Bigarren zatian, 66. minutuan, heldu zen oriotarren gola eta Eztalako markagailua ez zen gehiago mugitu.

Recibe nuestras newsletters en tu email

Apúntate