Diario Vasco

Bergarako organo eskolako ikasleen kontzertua, zapatu eguerdian elizan

José Antonio Pascual Bergarako organo eskolako irakaslea.
José Antonio Pascual Bergarako organo eskolako irakaslea. / DV
  • José Antonio Pascual irakasleak beste organo saio bat eskainiko du abenduaren 18an, domekan hamabost

Errukizko Amaren elizako organoak dantzatu ederra hartuko du datozen egunotan. Pello Lete antzuolar organistak bultzatuta, bi kontzertu antolatu dira. Aurrenekoa, Bergarako organo eskolako ikasleen eskutik, zapatu honetan izango da, eguerdiko hamabi eta erdietan hasita. Bigarrena José Antonio Pascual haien irakasleak emango du abenduaren 18an, domeka, hamabiak inguruan, meza ostean hain zuzen.

«Lauzpabost lagun ariko dira zapatu honetan», dio Pello Letek. Tartean izango da bera. «Zortzi-hamar bat pieza joko ditugu berrogei minutu inguruko iraupena izango duen saioan». Musika oro har eta organoa bereziki gogoko dutenek aukera aparta dute elizara joan eta instrumentuaren doinuak entzuteko. Doan da sarrera.

Baita José Antonio Pascual organista donostiarrak abenduaren 18an emango duen kontzertuan ere. Meza osterako laga dute. Beraz, hamabiak inguruan hasiko da. Mezatara joaten direnek eliza barruan geratzeko arrazoia badute egun horretan. Beste batzuk gero sartuko dira.

Ia hiru urte dira Errukizko Amaren elizak horrelako beste saio bat hartu zuela. 2011ko urtarrilaren 25ean izan zen. Orduan bederatzi organo ikaslek -Bergarako eskolako zazpik eta Azpeitiko bik- parte hartu zuten. Hamar pieza jo zituzten. Pello Letek, Eugenio Etxebestek, Lorea Larrañagak, Miren Azkaratek, Inazio Arakistainek, Elena Lakak, Mikel Arenasek eta Leo Juaristik osatu zuten taldea. Haietako zenbait etorriko dira baita zapatukora.

Hona interpretatu zituzten obren zerrenda: L'Organiste bildumako Pièce en Ut Majeur (César Franck), Pedal exercitum BWV 598 eta Kantata BWV 35 (Johann Sebastian Bach), Tourdion (Pierre Attaignant), Récit de hautbois et Marche (Lefebure-Wély), Liebster Jesu, Ein feste Burg ist unser Gott eta Praeludium und Fuga (Johann Sebastian Bach) eta Toccata Si m (Eugène Gigout).

Recibe nuestras newsletters en tu email

Apúntate