Diario Vasco

Debagoieneko hogei lagun inguru joango dira Aiherrara zapatuan baserri bat ikustera

Aiherrako baserri bat eta ezkerrean, goian, Belzuntzetarren gaztelua.
Aiherrako baserri bat eta ezkerrean, goian, Belzuntzetarren gaztelua.
  • Arrasatetik irtengo da autobusa eta lur jabetza transmisioa zela egin zen ezagutuko dute bertaratutakoek

Antzuolarekin anaikidetza harremana duen Iparraldeko Aiherrara egun osoko irteera egingo da zapatuan. Debagoiena eskualde osoko hogei lagun inguru joango dira Nafarroa Behereako herri hartara. «Antzuolakoak eta Oñatikoak doaz batik bat, baina baita Eskoriatzakoak eta Bergarakoak ere», diote bidaiaren ardura bere gain hartu duen Deba Garaiko Mendi Nekazaritza Elkartetik.

Hogeita lau lagunentzat lekua duen autobusa hartu dute antola-tzaileek. Astelehenean itxi zen izena emateko epea. Beraz, ostatuta dute taldea. Arrasateko Eroskin dagoen aparkalekutik irtengo da goizeko zortzi eta erdietan. Han dute hitzordua. Bertatik zuzenean irtengo dira Aiherrara.

Goizean, helduaz bat, Aiherrako baserri bat ikusiko dute. Iker Elosegi Euskal Herriko Laborantza Ganbarako teknikariak gidatuko du taldea. Baserri honek badu berezitasunik. Lehengo jabeak laga eta gazte batek hartu du. Lurraren jabetzaren transmisioa zela egin den azalduko dute.

Gai honen inguruan hitzaldia ere eman zen duela gutxi Antzuolan eta interesa piztu du baserriarekin eta lurrari lotutako lanekin harremana duten hainbat lagunen artean. Aiherrako esperientza honen berri bertatik bertara jasoko dute joandakoek: emandako pausoak, erraztasunak, arazoak...

Goizeko saioaren ondoren bazkaldu egingo dute Debagoienatik joandakoek. Arratsaldez, berriz, herria zein aihertarrekin berba egiteko aukera izango da itzulerako bidea berriz hartu aurretik.

Urteroko bisitaz eta festa giroaz gain, Antzuola eta Aiherraren arteko anaikidetzak beste fruitu ba-tzuk eman ditu. Eskolako umeena izan zen bat eta honek baserriarekin du zerikusia.

Recibe nuestras newsletters en tu email

Apúntate