Diario Vasco

Bergaran 5-0 galdu arren futbol talde nagusiak lider segitzen du bere multzoan

Bigarren urteko alebinek Arrasaten ekin zioten denboraldiari. Eta gainera, irabaziz.
Bigarren urteko alebinek Arrasaten ekin zioten denboraldiari. Eta gainera, irabaziz. / AKE
  • Derbietako bi irabazi dituzte eta beste bitan galtzaile irten dira AKEko kideak

Antzuola Kirol Elkarteko zortzi futbol talde aritu dira asteburu honetan. Eskola mailako denboraldiak hasi dira eta lehen ziharduten laurei beste horrenbeste batu zaizkie. Aurreko asteburuan egutegiak hala aginduta atsedena hartu ondoren, itzulera txarra izan dute nagusiek. Bergarak 5-0 irabazi zien. Halere, lidertzari eutsi diote Igor Larrearen mutilek. Partida denak, bost, irabazita zituzten domekara arte eta bide horretara itzultzea komeni da.

Lau derbi jokatu dira Antzuola eta Bergararen artean asteburuan eta bina irabazi dituzte. Jubenilak 4-1 nagusitu ziren Eztalan Facundo Giménezen bi goli eta Jon Cotillasen bati esker. Bestea bergararrek euren atean sartu zuten. Talde hau ere aurreneko postuan da sailkapenean lehen itzulia bukatu ostean. Puntu bakarreko aldea du Urkirekin eta bikoa, berriz, Mondragonekin. Estu daude gauzak.

Kadeteak ere hiru punturekin itzuli ziren Bergaratik 1-2 garaipena eskuratu ondoren. Asier López eta Unai Murgiondo izan ziren golegileak. Multzoan aurrera egin dute, laugarren jarriz. Infantilak Azkoitira joan ziren Anaitasuna liderrari aurre egiteko asmoz. Baita egin ere. Oier Garayoak sartutako golarekin banakoa atera zuten.

Bigarren urteko alebinak aurten lehen aldiz irten ziren zelaira Arrasaten. Partida gorabeheratsua aurrera atera zuten: 5-6. Pozik ziren. Bai hasi aurretik zein bukatu ostean. Maila bereko lehen urtekoak Beasainera joan ziren. Hiru neurketatan denetarik egin zuten: galdu, berdindu eta irabazi. Neska alebinek estreinaldia zuten baita Bergaran. Etxekoak 8-1 gailendu ziren.

Benjamin mutilek, bestalde, zortzi taldeko bilkuran parte hartu zuten Eztalan: Arrasateko hiruk, Aretxabaletako hiruk, Soraluzekoak eta Antzuolakoak. Jende mordoa bildu zen bertan. Eguraldiak ere lagundu zuen.

Recibe nuestras newsletters en tu email

Apúntate