Diario Vasco

Jose Mari Lezeta eta Florentino Lamariano sari barik itzuli dira, «baina bapo bazkalduta»

Sukaldari. Lezeta eta Lamariano, Altzako lehiaketan.
Sukaldari. Lezeta eta Lamariano, Altzako lehiaketan. / LANDATXOPE
  • Landatxopeko sukaldari bikoteak Gipuzkoako txapelketako finalean parte hartu du Altzan

Jose Mari Lezetak eta Florentino Lamarianok jubilatuen Gipuzkoako gastronomia txapelketan parte hartu zuen eguenean Donostiako Altza auzoko Altzatarrak elkartean. Debagoieneko lehiaketan irabazi ondoren, eskualdearen izenean joan zen finalera Landatxopeko bikotea.

«Sari barik itzuli ginen Antzuolara, baina bapo bazkalduta», dio Florentino Lamarianok. «Bederatzi bikote ginen, baina azken orduan haietako bat ez zen agertu. Bakailaoa prestatu genuen. Altzakoek eurek irabazi zuten».

Landatxopekoen jardunak ez du etenik eta zortzi lagunek Gipuzkoako Nagusien Martxan parte hartuko dute gaur Donostian. Bederatzi kilometroko ibilaldi neurtua dute zain.

Martitzenean, bestalde, Onceko La Soirée antzeztaldeak 'Oromenak' obra eskainiko du Torresoroako areto nagusian. Arratsaldeko seietan hasiko da saioa. Argien Mendean gaztelu batean izandako bizipenen inguruko lana da.

Odol-emaile omenduak

Sei antzuolar odol-emaile daude Eibarren gaur egingo den intsignia eta diploma banaketako zerrendan. Deba Arro eskualdekoa da eta azken urtean zenbait kopurutara heldu direnak hartzen diran kontuan.

Horrela, Pablo Hernandok 100 bider eman du odola. Nikolas Zabalo 75era heldu da (emaile bikaina); Idoia Conget, 40ra (urrezkoa); Idoia Aranguren eta Santi Ayastuy, berriz, 25era (zilarrezkoak).

Bi futbol partida Eztalan

Antzuola Kirol Elkarteko futbol talde nagusiak atsedena hartuko du asteburu honetan, egutegiak hala aginduta. Lider dira oraingoz partida guztiak irabazi ondoren. Neurketa garrantzitsua dute hurrengoa, Bergararen kontrako derbia. Lehiaketara itzultzeko motibaziorik ez dute faltako.

Baina Eztalan bada zerikusirik. Kadeteak Aretxabaletaren aurka ariko dira gaur arratsaldeko lau eta erdietan. Infantilek, berriz, bihar ekingo diote denboraldiari Azpeititik etorriko diren Lagun Onakeko kideen kontra. Eskola mailako lehiaketa da eurena. Alebin eta benjamin mutilak zein alebin neskak hurrengo asteburuan hasiko dira.

Jubenilak kanpora doaz gaur, Zumarragara hain zuzen. Urola izango dute zain Argixaon arratsaldeko seietan. Antzuolarrak sailkapeneko lehen postuan dira bost jardunaldi bete ondoren eta Urkiri atera dioten hiru puntuko aldeari eutsi nahi diote gutxienez.

Recibe nuestras newsletters en tu email

Apúntate