Hamazortzi lagunekin hasi du futbol taldeak aurredenboraldia

Lagunarteko partidak ixten ere badihardute entrenatzaileak berak eta zuzendaritza batzordeko kideek. «Oraingoz bi ditugu ziurtatuta», dio Nogueirasek berak. «Hilaren 8an, arratsaldeko 7ean, Eztalan Ilintxaren aurka jokatuko dugu eta hilaren 12an, zapatuan zortzi, Zumarragako Argixao futbol zelaian Urolaren kontra. Arratsaldeko lau eta erdietan jarri dute ordua». Bergaratik ez zuten deirik jaso joan den asteburuan Agorrosinen jokatu zen hiru taldeko lehiaketan parte hartzeko.

Lan handia du Juanjo Nogueirasek liga hasi aurretik. Iazko denboraldia bukatu zenean zalantzak zeuden zenbat futbolarik jarraituko zuten taldean. Mailaz jaitsi eta lehengo entrenazaileek alde egin ondoren, bazen beldurra. Taldearen jarraipena bera ere zalantzan jarri zen zenbait unez.

Baja asko ditu Antzuolak. «Oraingoz sei-zazpi lagunek segitzen dute», azaldu du prestatzaile berriak. «Ikusiko dugu datozen egun eta asteetan laga duten zenbait futbolari entrenamenduetara azaltzen diren ala ez. Esperantza badugu. Erdia baino gehiago berriak dira egun entrenatzen dudan taldean. Ateak zabalik ditugu etorri nahi dutenentzat». Besoak zabalik hartuko dituzte. Hamazortzi futbolari ez dira asko...