Txartelak aurretik erosi ez dituztenek ezin izango dute bertatik bertara ikusi gaur Donostian egingo den Bertso Eguneko ekitaldi nagusia, 'Hustubetehustu' ikuskizuna, agortu egin baitira sarrerak. Hala ere, edonork izango du bertso giroaz gozatzeko aukera, bertsolariek eta bertsoek hartuko baitute eguerdi partean Boulevarda eta Alde Zaharra, hiru bertsolari bikote arituko direla deman. Saioa bera, urrutitik bada ere, bertsoa.com web gunean jarraitu ahal izango da zuzenean eta ETB3n, aurrez grabatuta, gaueko 22:00etatik aurrera.
Ikuskizun berritzaileak
1967an Uztapideri eskaini zitzaion aurreneko Bertso Egunetik hona -Bertsolari Eguna ere deitu izan zaio-asko aldatu dira gauzak, eta eguneko ekitaldi nagusia ere joan da urtez urte garai berrietara egokitzen, bertsolaritzaren inguruko berrikuntza ugarien lekuko. 1995 urtera arte omenaldi kutsua zen nagusi Bertso Egunean. Norabidea aldatu eta kontzeptualagoa bilakatu zen Bertso Eguneko ikuskizun nagusia ondoren, eta bide horri eutsi dio azken hamabost urteetan. Aurten, jaikina denez, Jorge Oteiza sortzailea izango da 'Hustubetehustu' ikuskizunaren ardatza. Txapelketa Nagusiaren ondorengo aurreneko Bertso Egunean, txapelduna eta txapeldun ohia ikusteko aukera izango dute, besteak beste, bertaratuek. Maialen Lujanbio, beste hemezortzi bertsolarirekin batera, bertsotan; Andoni Egaña, lana Unai Elizasurekin partekatuz, aurkezle gisara.
Aurkezleek proposatuko dizkieten bideetatik, bertsolariak -zortzik ardaztuko dute saioa, gainerakoak gonbidatu gisara azalduz-, Oteizaren unibertsoa bertsotara ekartzen saiatu beharko dira.
