Bihar goizeko 11:00etan inauguratuko da agintariekin Lauburu eraikina. Eguerdiko 12:00etatik 14:00etara bitartean ateak irekita egongo dira herritarentzat. Horrela ikusi ahal izango dira guneko areto denak, proiekzio gela, lau biltoki, eguneko zentroa, osakidetzako kontsultorioa, sukaldea bi jangelekin, soinketa aretoa aldegelekin, liburutegia, informatika gela, ludoteka, bilera gelak eta etxe tutelatua.
Nahiz eta Lauburu gunea inauguratua geratu, erabilera martxa edo irekiera eguna urtarrilaren 7an izango da, Errege ondorengo egunean. Aretoen bisita artean, aho gozagarri bat izango da bertaratzen diren denentzat.
Osakidetzako mediku kontsultetan, Aizarnazabalgo herritar denon ardura izango du mediku batek, nahiz eta orain arte bezala txandak Zestoan hartu behar; zerbitzu hau otsaila aldera hasiko litzateke. Soinketa gelan, harpidetza txartel bidez funtzionatuko da, goizeko 8:00etatik iluntzeko 9:00etara bitartean, astelehenetik ostiralera, 16 urtetik gorakoentzat, norberak zaindu beharko duelarik materiala eta tresneria; kameraz zainduta izango da gela hau. Harpidetza udaletxean egingo da urtarrilaren 7tik aurrera.
Ludoteka, 0tik 7 urte bitarteko haurrentzat izango da, 16:00etatik 19:00etara bitartean, ume bakoitzaren ardura eta materialaren erabilpenaren ardura gurasoek edo zaintzaileek izango dutelarik.
