DV. Liburu elektronikoa, e-liburua, liburu digitala? Izena bera ere ondo finkatu gabe duen euskarri berria «Harri Aroan» dago oraindik mendetako esperientzia pilatzen duen paperezko anaia nagusiaren aldean, Jorge Giménez Bech Alberdania argitaletxeko editorearen ustez. Hala ere, liburugintza ez ezik irakurtzeko modua ere irauliko duen euskarri berriaren aldeko apustua egin du Alberdaniak, eta atzo aurkeztu zuen Donostian bere funts digitalaren oinarria izango den 35 tituluz osatutako sorta.
Jorge Giménezek aitortu zuen asko direla oraindik argitu beharreko kontuak. Besteak beste, elektronikoak eta paperezkoak izango duten baterako existentzia luzean zein izango den euskarri berrira ondoen egokituko den liburu mota... Baina ikuspegi guztiz praktikotik ere badaude, ziurgabetasuna nagusi izan arren, ezinbestean hartu beharreko erabakiak. Esaterako, zein formatutan digitalizatu eta saldu liburuak. Irakurgailu dezente daude merkatuan, eta ez dituzte guztiek formatu denak onartzen. Hori dela eta, «ez gaitezen geu izan irakurleari zein irakurgailu erabili behar duen esaten diogunak», bi formatu zabalduenetan emango ditu liburuak Alberdaniak. Erosleak EPUB eta Mobipocket formatuen arteko aukera egin ahal izango du, alegia. Libururen bat PDFan ere egongo da eskuragarri, hala nola Ihes ederra eleberri irudidun argitaratu berria, ordenagailuko pantailan gozatzeko irakurgailuko pantaila txikian ikusteko baino egokiagoa.
Euskaraz eta gaztelaniaz
Liburu elektronikoari zer prezio jarri ere eztabaida askoren iturri da. Alberdaniak paperezkoaren %70an saltzea erabaki du; paperezko bertsioan 18 euro balio duen liburua, adibidez, 12,5 eurotan. Erabaki dutelako, batetik, egileari diru kopuru berbera ordaintzea liburua paperezkoa edo digitala izan eta, bestetik, liburu elektronikoak %16ko BEZa duelako, paperezkoak duen %4aren aldean. Aurreneko txanda honetako liburuak Inazio Mujikak aurkeztu zituen, abenduaren 4tik aurrera Alberdaniaren web gunean eskuragarri egongo diren tituluen artean euskarazko 13 nobedade, gaztelaniazko 11 lan eta Alberdaniaren funtseko beste 11 liburu aurkitu ahal izango direla azalduz. Ekimenetik kanpo gelditu dira, momentuz, Alberdaniaren ezaugarrietako bat diren literatur itzulpen gehienak, eskubide elektronikoen auzia ere argitzeke dauden kontuen artean kokatu behar baita.
Aurrerantzean, bertsio bikoitzean plazaratuko ditu Alberdaniak nobedadeak, paperean eta formatu digitalean, eta pixkanaka-pixkanaka aurreko urteetan argitaratutakoak gehituko dizkio funts digitalari. Web gunea eta liburu-denda birtualak izango dira banaketarako bide nagusiak, baina liburu-denda tradizionalak ere badu tokirik Alberdaniaren ekimen aitzindarian. Betiko liburu-dendetan, liburu elektronikoak erostea ahalbidetuko duten kupoiak jarriko dituzte salgai. Kupoia saltzeagatik liburu arrunt bat saltzeagatik adina diru jasoko du dendak.
