DV. Aste honetan hasita, 'Ahotsak' proiektuak Bedaioko hamalau bizilagun elkarrizketatuko ditu, 'Bedaio Kontu Kontari' egitasmoa sendotu eta honi jarraipena emanez. Pasa den igandean bildu ziren lehen aldiz 'Ahotsak'-eko, 'Balerditik' blogeko eta Artubi elkarteko kideak hamalau bedaiotar hauekin, eta, esan bezala, aste honetan hasi dira banakako elkarrizketak burutzen.
'Ahotsak' uda aurretik jarri zen harremanetan 'Balerditik' blogeko eta Artubi elkarteko kideekin, 'Bedaio Kontu Kontari' proiektuari buruz hitz egiteko. Proiektu honek bi helburu ditu: batetik, Bedaioko ahozko ondarea eta herri hizkerak bildu eta hedatzea, eta bestetik, adinekoen euskara eta bizipenak jaso eta herritarren artean zabaltzea.
Orain arte, 'Bedaio Kontu Kontari' egitasmoaren baitan Larrañetako Maria eta Eletxeko Martinekin bilduak ziren, eta orain 'Ahotsak'-ekoekin elkarlanean, beste hamalau lagun elkarrizketatuko dituzte. Esan bezala, joan den igandean bildu ziren guztiekin Nagusietxean lehenengo harremana burutzeko, eta aste honetan hasi dira elkarrizketak banaka egiten. Igandeko solasaldian 'Ahotsak'-eko Miren Artetxek eta Artubi elkarteko Nekanek eta Txarlik hartu zuten parte. «Elkarrizketa hauek bideoz grabatuko ditugu eta material hori ahotsak.com web gunean zintzilikatuko da», azaldu du Txarlik, «baina guk ere grabazio horien kopiak jasoko ditugu. Web gunean, sare sozialean eta 'Balerditik' blogean zintzilikatzen joango gara (copyleft lizentzia izango dute), eta aurrerago DVD bat argitaratzeko asmoa ere badugu».
