DV. Txintxarrisferako kideek antolatuta, bihar arratsaldeko 17:00etatik aurrera, 'Ardiki mapping party'-ren lehenengo edizioa ospatuko da Alegian. Herriko mapa librea egitea da ekimen honen helburua. Proiektuaren inguruko azalpen bat jaso ondoren, herriko datu bilketa egingo dute GPSarekin, eta datu horiek OSMra igoko dituzte (OpenStreeetMap). Editatu, etiketatu eta xehetasunak jarri ondoren, mapa osatuko dute.
Modu honetara lizentzia askea duen mapa bat sortuko dute. Egungo mapek lizentzia debekatzaileak dituzte, edo ordaindu egin behar dira, edo ezin dira aldatu,...
Txintxarrisferako eta Tagzaniako kideen ekimenez sortuko den Alegiako mapa hau edonork erabili, aldatu, osatu,.... ahal izango du.
Aurten, biltzarraz gain beste ekitaldiren bat egitea otu zitzaien, udazken kulturala probestuz, eta hortik etorri da biharko mapa-festaren ideia. Herria 'mapeatu' ostean, 'friki-poteoa' egingo dute, eta 21:00ak inguruan Ugartera joango dira urteroko ardiki-jana ospatzera.
Gaur ipuin kontaketa
Herriko txikienei egingo die keinua gaur 'Udazkenean Kultura'k. Arratsaldeko 18:00etatik aurrera, Maite Franco ipuin kontalariak makina bat istorio liluragarri kontatuko dizkie liburutegira hurbiltzen diren umeei.
