DISKOA
DV. Zeren Zai talde donostiarrak beste disko bat plazaratu du: Ametsei koloreak margotuz. «Esan liteke pop-rocka egiten dugula. Beti garrantzi handia eman izan diogu melodiari, eta hau ere oso disko melodikoa da», esan zuten atzoko aurkezpenean.
Hamar kantu dakartza diskoak, eta bideoklipa ere bai, «gure zaleentzako oparia», taldekideen esanetan. Donostia eta Hondarribian egindako bideoklipa da, eta taldekideak ere inguru horretakoak dira. Hiru lagun Donostiakoak dira (Ion Izaga gitarjolea, Iraitz Igartza gitarra eta teklatujolea eta Julen Arzelus kantaria); beste lagun bat Errenteriakoa da (Gabi Hernandez baxujolea); eta Javi Alberdi baterijolea Irunen bizi da.
Taldearen lehenengo diskoa Gure uhartea izan zen, 2004an plazaratutakoa. Gero, 2006an, bi lagunek utzi egin zuten taldea, eta 2007an bigarren diskoa etorri zen: Lur berrietara.
«Oraingoa diskorik osatuena da, benetan -esan zuten atzokoan-. Erritmo oso bariatuak ditu. Zenbaitetan badu funky ukiturik, beste batzuetan ilunagoa da, edo oso rockeroa... Eta ez dago betelanik», esan zuten atzokoan.
Normalean, lehenbizi doinuak asmatzen dituzte, eta ondoren letra eransten diete. Iraitz Igartza, Julen Arzelus eta Ion Izaga ari-tzen dira letragintzan. Batzuetan amodioari buruzko kantak egin dituzte (Minutu bat, Zu marraztuz, Hainbat izar, Ezin irtenik), beste batzuetan kanta filosofikoak irten zaizkie (Gau isilean, Atzera begira), eta bada armen kontrako ale bat ere (Gudarako aitzakiak).
Bi eratako formatuak ditu taldeak, elektrikoa eta akustikoa. Igande honetan Kilometroetan joko dute, Kotxeretako gunean, baina entzuteko goizago ibili beharra dago, goizeko 10etan ariko baitira.
