IRUN. DV. Euskal Herrian ekitaldi ofizialak, inaugurazioak eta bestelako zeremoniak Ohorezko Aurreskuarekin hasten dira askotan. Zentzu berezia hartzen du kasu hauetan euskal dantzak. Are gehiago estreinatzear dagoena Kemen bezalako dantza talde baten egoitza denean. Orduan, ez du dantzari batek bakarrik Aurreskua dantzatzen, bertara hurbiltzen diren guztiek dantzatzen dute agurra.
Eta hori izan zen, hain zuzen ere, ostiral arratsaldean egin zutena Palmera-Montero auzoan. Kemen Dantza Taldeak egoitza berria estreinatu zuen Jose Antonio Loidi Bizkarrondo kalean.
Bertara dantzariak, auzoko bizilagunak eta Udaletxeko ordezkariak hurbildu ziren besteak beste. Inaugurazioa egin ondoren, egoitza ikusteko aukera izan zuten Palmera-Monterora gerturatutakoek. Pintxoak dastatzeko eta dantzaz eta beste hainbat gauzataz hitz egiteko denbora izan zuten baita ere.
Egoitza berriak ez du Izaga kalean zegoen lokalarekin zer ikusirik. Kemen taldekoek toki handiagoa izango dute hemendik aurrera dantza egiteko. Bi areto dituzte dantzatzeko. «Lehen 65 metro karratuko areto bat besterik ez genuen», zioen Kemen Dantza Taldeko Eder Valladaresek. «Orain, 45 metro karratuko bat eta 90 metro karratuko beste bat dugu. Entseguentzako espazio handiagoa dugu orain eta musikariek enteseguak egiteko aukera dute. Lehen lokaletik kanpo entsaiatu behar zuten».
Bada beste aldaketarik egoitza berrian. Esaterako Palmera-Monteroko lokalak «bi aldagela ditu. Lehen bat genuen, zortzi metro karratukoa. Komuna eta bi dutxekin. Ez zen batere erraza hogeita hamar pertsona bertan aldatzen saiatzea. Lokaletik kanpo beste biltegi bat eta bulegoa dugu. Aldaketa hoberuntz izan da, noski», zioen Ederrek. «Jantziekin adibidez. Lehen hamar metrotan jantzi guztiak pilatu behar genituen. Orain dugun espazioa askoz ere handiagoa da».
Haurrentzako eskola
Gogo handiarekin emango zaio hasiera 2009-10 ikasturteari Kemen Dantza Taldean. «Ilusioa urtero dugu baina orain arte ideia asko airean geratu zaizkigu leku faltagatik. Lokal berri honi esker orain arte tintontzian geratu zaizkigun ideia horiek guztiak aurrera eraman ahal izango ditugu».
Ideia horietako bat haurrentzako dantza eskola da. Orain arte, Kemen taldeak Irun eta Hondarribiko ikastolatan eskaintzen zituen dantza ikastaroak. Baina hemendik aurrera Palmera-Monteroko egoitzan ikasteko aukera izango dute haurrek.
1973an hasi zen Kemen Dantza Taldearen ibilaldia. Hasieran Biteri eskolan izan zuten egoitza. Ondoren, 1981an, Izaga kalean finkatu ziren eta hogeita zortzi urte igaro ondoren ibilaldiari bultzada berria emango zaio estreinatutako egoitzari esker.
