ARRASATE. DV. Debagoieneko udal euskaltegiek EGAtik gorako ikastaro berri bat eskeiniko dute hastear dagoen 2009-10 ikasturtean. Arkaitz Biain euskara zinegotziaren hitzetan, «ikastaro hau administrazio publikoan lanean ari direnentzat edo lan egin dutenentzako» da. Bere euskara maila hobetu nahi duten irakasle, kazteri edo edozein harritarrentzat da bereziki interesgarria. Ikastaroak 150 ordu presentzial izango ditu, eta beste 15 tutoretzak egiteko.
«Gu gara»
«Gu gara» lelopean abian jarri dute Arrasate, Aretxabaleta, Eskoriatza eta Bergarako udal euskaltegiek ikasturte berriaren aurkezpen kanpaina. Iragarki, eskuorri, web-gune, sare sozial, SMS... bidez ari dira kanpaina hau gauzatzen. Bertan zehazten da, besteak beste, 2009-10eko eskaintza akademikoa: modulu ezberdinak eta tutoretzak; euskalduntzearen maila guztiak (alfabetatzea, EGA, hizkuntza eskakizunak...); gazte etorkinei zuzendutako hizkuntza errefortzuak; autoikaskuntza ikastaroak (Boga programa informatikoaren bidez); euskalkia; hitanoa (hika berba egiten); Aisa ikastaroak (etorkinei zuzendutako ikastaro bereziak); merkataritza eta hostalaritza (sektore hauetako langileentzat), eta 4. Maila (EGAtik gorakoa).
593 ikasle
Debagoieneko udal euskaltegiek 593 ikasle izan zituzten 2008-2009 ikasturtean. Ikaslego hau 56 taldetan banatu zen.
Ikasleen %69,13 emakumeak ziren eta %30,87 gizonezkoak. Bataz besteko adina 37,52 urtekoa izan zen. Ikasleen %30,86 langabeak ziren, eta %16,18 etorkinak. Autoikaskuntza ikastaroa 38 ikaslek jarraitu zuten, eta euskara errefortzu eskoletara 5-15 urte bitarteko 83 ume joan ziren.
Azkenik, Leintz Udal Euskaltegiak bere 25. urteurrena ospatuko du ikasturteean zehar oraindik zehazteke dauden ekintza eta ekitaldiekin.
