DV. XXXVIII Dinastia Etxabe pilota txapelketa bere amaierara iristen hasia da. Astearte gauean jokatu zen Zestoako pilotalekuan txapelketako lehen finalaurrekoa; bigarrena, berriz, ostiral gauean jokatuko da, Zestoan baita ere, gaueko 10etatik aurrera.
Lehen finalaurrekoan honako emaitza hauek eman ziren: Jubenil mailan, Etxaniz eta Aizpuru, 16; Urbieta eta Arratibel, 22. Nagusien mailan, berriz, Antxotegi eta Mendinuetak 22-16 emaitzarekin irabazi zieten Larrañaga eta Arzelusi.
Bihar, 22:00etan, Txapelketako bigarren finalaurrekoa jokatuko da. Jubenil mailan, Sukia-Zinkunegi eta Jauregi-Zendoia bikoteak neurtuko dira; senior mailan, berriz, Andreu-Bolinaga eta Iribar Uzkudun. Aipagarria da norgehiagoka honetan zumaiar bat izango dela, iazko irabazle Gorka Iribar, hain zuzen ere.
Txapelketaren antolatzaileak gustura ageri dira orain arte eman duenarekin. «Partida ederrak ikusten ari gara. Ikusleen aldetik, jende kopuru polita inguratzen da jardunaldi guztietara», zioen pilota elkarteko kide Javier Carballok.
