Urteak darama elizako harria bertako intxaurrondoren azpian. Badira, eserleku gisa erabili duten herritarrak denbora luzean kontu batzuk esateko bilgune bihurtuz. Baina Berastegiko harri honek badu bere istoria. Javier Salvarredik, 'Aidanen' herri aldazkarian ateratako erreportaiaren arabera harria, gutxi gorabehera, azken aldiz 1946 urtean erabili zen apustu baterako. Urte hartan, Juan Saizar 'Jakas' eta Dendaberriko Joxen arteko apustua izan zen. Salvarredik jasotako datuen arabera, «apustuan jokatutako dirua, mila pezeta alde bakoitzak». Egin beharreko lana berriz «Jakasek bere idi parearekin inoren laguntzarik gabe, ordubeteko denboran elizari buelta osoa eman behar zion harriarekin»
Bertan izandako herritarrek gogoan dute orduan ere ikusmira handia sortu zela herrian. «Ni mutil kozkorra nintzen, sei bat urte nituen. Gogoan dut, aste egun batean egin zela. Eskolan ginela, maixuak apustua ikustea joan behar genuela esan baitzigun. Denak utzi eta gainontzeko herritarrak bezala han bildu ginen denak, eliz inguruan» aipa-tzen zuen Gregorio Yeregik. Apustu gogorra izan zen Yeregin esanetan «ordu bete zuen Jakasek idiekin elizari buelta emateko eta gogoan dut, behin baino gehiagotan hautsi zitzaiola katea eta komeritan ibili zela. Denak, idi parearen atzetik ibili ginen ikusten bertatik egindako lana».
Yeregik zionez «orduko zolua ere ez zen gaur egungoa bezalakoa. Zulo, lokatza eta harriak zeuden eta idiek lan gogorra egin behar izan zuten. Hala ere, irabazi egin zuen Jakasek». Berastegiarrak «harria beti ezagutu dugu elizako intxaurrondoaren azpian. Inork ez daki nondik ekarritakoa den. Harri gorria da, hemen ingurukoa, baina ez dago zertarako edo zeinek ekarritakoa den arrastorik».
