Ezkio-Itsaso
Kexak idazteko inprimakiak udaletxean eta herriko bi ostatuetan egongo dira eskuragarri
28.07.09 -
Salaketak Udaletxeko buzoian egingo dira. / M. GALILEA
DV. Hizkuntza eskubideen inguruko kanpaina martxan jarri du Ezkio-Itsasoko Udalak UEMA eta Behatokiarekin elkarlanean.
Ezkio-Itsasoko herritarrak hizkuntza eskubideen urraketak salatzera bultzatzeko kanpaina izango da, eta noski, Ezkio-Itsasoko udalak berak ere udalean euskaraz funtzionatu ahal izateko dituzten oztopoen inguruko salaketak egiteko konpromisoa hartu du.
Etxez etxe kanpainaren berri emateko diptikoa banatu dute, eta udaletxean jarri duten buzoian jaso ahal izango dira urraketen inguruko kexak. Kexak idazteko inprimakiak udaletxeaz gain, herriko ostatuetan ere egongo dira herritarren eskura.
Horrela, Ezkio-Itsasoko Udalak herritarrak kanpaina honetan iraunkorki parte hartzera bultzatu nahi ditu. Bakoitzak eman genezakeen apurrak askotarako balio duela sinetsita dagoelako.
Zer salatu
Salaketen artean hauen adibide batzuk ematen dituzte: mediku erdalduna izatea; erakunde publikoetan gaztelaniaz atenditua izana; erakunde publiko batetik gutuna gaztelania hutsez jaso duzula; etxean propaganda gaztelaniaz jaso duzula; notaritzan euskara hutsezko dokumenturik onartu ez dizutela; edo asegurua gaztelaniaz eman dizutela, besteak beste.
