15.05.09 -
DV. 1.200.000 euro. Horixe kostatuko zaio Amezketako Udalari Juan Lopez Enea edo Aierbenea deituriko eraikina erostea bertan Erabilera Anitzeko Herri Zentroa egiteko. Halaxe onartu zuen apirilean ospatutako plenoak, bertan bildutakoen aldeko bost boto eta bi abstentziorekin. AELko ordezkariak izan ziren abstenitu zirenak, ez baitute «diru aldetik garbitasunik ikusten».
Erabilera Anitzeko Herri Zentroaren oinarrizko proiek-tua egin eta onartu ondoren, Osakidetzatik plan funtzional berri bat jaso du Hirigintza Batzordeak 15-20 metro karratuko azalera handiagoa eskatuz. Handitze horrek, ordea, areto nagusiaren azalerari eragiten dio, 75 metro karratutan utziz. Horregatik, areto nagusia txikia geratzen dela ikusita, Hirigintza Batzordeak onartu du etorkizunean Osakidetzako zentroa Plantxenera eraman daitekeela, modu horretara, Kultur Etxeko areto nagusia handituz. Bestetik, Kultura Batzordeak adierazi duenez, Agenda 21etik Amezketan Aste Berdea ospatzeko proposamena jaso dute. Aste horretan, etxe bakoitzari erosketak egiteko poltsa bat oparituko litzaioke, plastikoaren erabilera ekidinez zaborra murrizteko. Horrez gain, gela polibalentean bi film proiektatuko lirateke eta ekainaren 7an mendi irteera bat egingo litzateke. Azkenik, aste horretan bertan, labe solarra nola egin ikasteko aukera izango lukete herritarrek, erakustaldi txiki batekin.
