03.03.09 -
Larunbat goizean ari naiz, eguraldi guztiz ederrarekin, zuk hiru egunera irakurriko duzuna idazten. Hausnarketa eguna dugu gaurkoa. Etzi (zuretzat atzo) jakingo ditugu bihar egingo diren Legebiltzarrerako bozen emai-tzak. Hiru egun aurretik zaila ez ezik ezina dago zer datorren asmatzea; ez nuke asmatuko, ezta Irisen bederatzi musei adimena eskatuta ere. Jakin, ordea, badakit (bart eskuin besaburuan erreumak gogotik eraso dit eta) eguraldia behintzat asko aldatuko zaigula; besterik ezer aldatuko ote zaigun, eta zein aldetara, auskalo. Ez du balio iragarpen geldoetan hasteak. Hala ere.
Alde batetik, hiru multzo ikusten ditut boto-emaileen artean. Botoa nahita emango ez dutenena, abstentzioa, boto-tontoa; botoa eman nahi bai, baina ezingo dutenena, nuloa, boto-potoa; eta baleko boto-papera erabiliz boto-botoa emango dutenen multzoa. Azken honek irabaziko du, jakina. Beste aldetik, berriz, hiru talde ikusten ditut boto-hartzaileen artean ere: bikoa, EAJ eta PSOE, eta auskalo zein Lehendakari; hirukoa, PSOE eta PP eta UPyD, eta Patxi Lehendakari; eta lauko taldea, EAJ-EA-EB-Aralar, eta hemen ere ezetz Ibarretxe Lehendakari...! Geroa, testigu. Eta azkenik (behar zaitut eta gera zaitez, behar ez zaitut eta ken zaitez), hiru hanka izan baietz gobernu-mahaiak, ezkerrera zein eskubira dezenteko kolokarekin...
Horra hiru multzo, hiru talde eta hiru hanka. Hiru hirukok bederatzi egiten dute. Eta esaera da: bederatzi, sar itzak ipurdian behatz bi. Edota: hiru eta hiru sei, eta hiru bederatzi, Bitoriko zakurrari dantzan irakatsi.
