07.01.09 -
DV. Asteburu honetan Lazkaon Astotxo eguna ospatuko da. Aurtengoa, urteroko gisan, igandean izango da, baina hori baino lehen, larunbatean bertan, gurdi ibiltariak, gaztaina erreak eta asto-proba izango dira herrian bertan. Biharamunean, aipatu bezala Astotoxo eguna izango da gurean. Era honetan, 10:00etan Asto diana egingo da herriko enparantzan. Handik ordubetera, 11:00etan, meza nagusia egingo da Zistetarren konbentuan. Eukaristiarako Lazkao abesbatzaren partaidetza izango da. 12:00etan Gipuzkoako X asto erakusketa eta lehiaketa egingo da plazan. Era berean, karro ibiltariak, salda, txistu emanaldia eta asto hoberena eta ederrena aukeratuko dira. Eguerdiko 13:00etan, egunarekin amaitzeko, Jesus haurtxoak bere gurasoekin Egiptora egindako ihesaren kale antzezpena egingo da. Ihes honen antzezpena 1652an sortu zen, eta orduz geroztik lazkaotarrek ohitura honi eusten diote.
Zuzenketa
Atzo kronika honetan argitaratu zen Lazkaon haurtzaindegi berria egiten ari direla. Informazioa ematerako garaian, aurrekontuaren kopurua gaizki eman genuen; ez da 1.150.000.000 eurokoa izango, 1.150.000 eurokoa baizik. Ongi esanak hartu, eta gaizki esanak ahaztu. n
