07.01.09 -
ANTZUOLA. DV. Jaiotakoen kopuruak hildakoena gainditu du Antzuolan 2008an. 29 ume jaio dira, hain zuzen, eta 21 lagun hil. Beraz, kanpotik etorritakoak kontuan hartu gabe, zortzi lagunetan hazi da Antzuolako biztanle kopurua iazko urtean.
Jaiotako 29 horien artean neskak hogei dira eta bederatzi baino ez mutilak. Hildakoen artean, aldiz, erabat kontrakoa izan da banaketa: hamahiru gizon eta zortzi emakume. Badira Antzuolan lurperatu baina gure herriko erroldan ez zeuden beste bi lagun. Horiek ez dira kontuan hartu zenbaketa honetan.
Jaiotza kopuruak zertxobait behera egin duen arren, nahiko goian segitzen du. Hildakoak, berriz, hogei inguruan ibili dira azken urteetan. Iazkoa izan zen salbuespena, 27raino igo zelako zenbakia.
Aurten ohiko kopuruetara jaitsi da. Azken zenbaketa ofizialaren arabera, 2.121 biztanle ditu gaur egun Antzuolako herriak. Gehien 2.300 inguru izan ditu, baina duela urte dezente.
