GETARIA
4-1 nagusitu zen Keta, jadanik 28 punto batuz
DV. Getariako Keta Futbol Taldeak bere lidertza sendotuz darrai, igandean Orioko Mendibeltz futbol zelaian Gazteak eibartarren aurka jokatutako partidako hiru puntuak ere eskuratuz, jada 28 punturekin, 9 puntuko aldea ateratzen diotelarik bigarren sailkatuari (Soraluze taldea), soilik 4 partida, 12 puntu, falta direnean ligilla hau amaitzeko.
4-1 irabazi zuten Ketakoek Gazteaken aurkako partida, neurketa uste baino lehiatuagoan. Izan ere, getariarrak hasieratik baloia ikustuz eta ongi mugitzen hasi ziren, baina emaitzik gabe.
Aurkariak, gehiegi erasotzen ez, baina adi getariarren hutsegitei. Horrela, 20 minutuan Ketak erasoan baloi bat galdu ostean Eibarkoek kontraeraso bizkor baten bidez lehen gola gauzatu zuten 0-1ekoa jarriz markagailuan.
Hala ere, getariarrek egoerari buelta eman eta hainbat aukeren ostean Iker Esnalek berdinketaren gola lortu zuen, atsedenaldira 1-1ekoarekin iritsiz.
Bigarren zatian, Ketakoak 3 puntuen bila zelairatu ziren, Esnalen bigarren golak aurretik ipini zituelarik. Getariarrak partidaren kontrolarekin egin ziren, Aritz Arregik beste bi gol lortuko zituelarik artean etxekoentzat, azkenean 4-1eko emaitza utziz.
Urtziren debuta izan zen igandean, eta Iker Esnalen agurra ere, ikasketak medio taldea uzten duelarik, nahi duenean itzultzeko.
