CULTURA
Bi mutikoren arteko harremana kontatzen du, horietako bat kartzelan dagoen judua
24.10.08 -
NATACHA APPANAH
DV. Iazko urtean Le dernier frère eleberria publikatu zuen, Parisen, Natacha Appanah-k. Harrezkero hainbat sari jaso du. Orain -gaztelaniaz baino lehenago, gainera- euskaraz irakur daiteke. Alberdania etxeak eman du argitara Azken anaia hau, Mikel Garmendiak itzulita.
Liburu horretan, 75 urteko gizon batek gogoratzen du nola, mutikotan, kartzelan zegoen beste mutikoskor baten laguna egin zen. Preso zegoen hark David zuen izena eta judua zen. Istorioa Maurizio Uhartean garatzen da eta egiazko gertaera batean dago oinarritua. Izan ere, II. Mundu Gerra garaian ingelesek Madagaskar ondoko uharte horretara bidali zuten Palestinara bidean zihoan ontzi bateko tripulazio iheslaria. Ez zuten judurik nahi aldamenean.
Kasualitate hutsez, Pijama marradunaz jantzitako mutikoa-ren antz handia du istorioak. Bada alde nabarmenik: horko horretan, mutikoa ez da jabetzen ondoan daukan mutikoa preso judua dela; Appanah-ren eleberrian, berriz, Maurizio uharteko mutila jakitun da bestearen sufrikarioaz.
