DV. Uztailaren 22an, datorren asteartean, hasiko dira uztaila eta abuztuan zehar astero herriko alde zaharra ezagutzeko eta txalupaz ibilaldia egiteko aukera eskainiko duten bisita gidatuak. Hauek astero egingo dira, asteartetan, azkena abuztuaren 26an izanik. Bisitak ordu t'erdiko iraupena izango du, arratsaldeko 17:00etan abiatuz Getariako Turismo Bulegotik. Bisitariek, gia turistiko baten laguntzaz, Elkano monumentua bisitatuko dute lehenik, jarraian herriko alde zaharretik barrena Salbatore Deunaren elizara abiatzeko, gure herriko ondare arkitektonikoa ezagutzeko aukera izanik.

Irtenaldia osatzeko, bisitariak portura jeitsiko dira bertan zain izango duten ontzian itsasoratu eta itsasotik Getariako eta Zarauzko bista ederrekin gozatzeko txalupa ibilaldian.

Plaza mugatuak

Irteera honen prezioa 12 urokoa da, 10 urtetik beherakoek bakarrik 6 euro ordaindu beharko dutelarik. Bertan parte hartzeko plazak mugatuak dira, ontzian gehienez 40 lagun sartzen bait dira. Interesatuek Aldamar parkean kokatua dagoen Getariako Turismo Bulegoan egin dezakete erreserba, zuzenean bertara joaz, edo nahiago badute 943140957 telefono zenbakira deituz.