AZPEITIA
Ikuskizuna 22:00an hasiko da Izarraitz Pilotalekuan
Itsasi taldeak, dantza berriak eskainiko ditu bere ikuskizunean..
DV. Astebeteko atsedenaldiaren ostean, Azpeitia Dantzan ekimenaren egitaraua berriro ere abian da. Alima Ekialdeko Dantza Taldearen emanaldia izan zen lehenbizikoa uztailaren 6an eta oraingoan herritarrak datozkigu, beraien azken lanaren aurkezpenarekin. Itsasi Euskal Kultur Taldeak Zazpi Haizetara ikuskizuna eskainiko du bihar, uztailak 19, 22.00an hasita, Izarraitz frontoian.
Azken urteetako ildo beretik jarraituz, dantza berriak izango dira ikusgai lan honetan. Euskal kantagintzan ezagunak diren zenbait abesti eta doinuekin osatutako koreografiak erakutsiko dituzte. «Baina ez dugu gure jatorria alde batera utzi nahi eta Euskal Herriko 7 lurraldeetako dantza tradizionalak ere taularatuko ditugu ikuskizun honetan», azaldu dute Itsasi taldekoek.
Ordubete inguru iraungo du ikuskizunak eta 30 dantzarik eta 7 musikarik hartuko dute parte.
Azpeitia Dantzan egitasmoak datorren astean jarraituko du. Uztailaren 24an, Sahatsa taldea eta Gazte-Alai talde argentinarraren arteko lana izango da ikusgai, plazan. San Inazio egunean emango zaio amaiera, Eslovaquiako Maj dantza taldearekin, Olatzko Amaren plazan.
