GETARIA
Josefina Azkuek, Miako serorak, omenaldia jaso zuen atzo
Giro ederrean ospatu zuten San Isidro eguna, festen azken eguna
Miaraino gerturatu ziren herritarrekmeza ondoren txakolin festan ere parte hartu zuten. [A.M.]
GETARIA. DV. Eguraldi ederrarekin, asko izan ziren atzo Miaraino San Isidro eguna ospatzera gerturatu ziren auzotar eta herritarrak, mezaren ostean txakolin festan eta Josefina Azkueri eskeinitako omenaldian parte hartu zutenak.
Urtero bezala, Artelatz elkarteak auzoko jubilatu bat omendu zuen atzo, San Isidro egunean, aurten 73 urte dituen Josefina Azkueri, Miako serorari, egokitu ziolarik omenaldia. Kultura zinegotziak, Ekaitz Balentziagak, aurreskua eskeini zion, jarraian alkateak zapia ipini eta Iñaki Solozabal 'Aitxitxe'k elkartearen izenean plaka eman ziotelarik, Getariako abesbatzak ere omenaldian parte hartuz.
Bitartean, omenaldiaren aurretik eta ondoren ere, txakolina eta parrillan erretako okela dastatzeko aukera izan zen bertan, trikitilariek girotuta.
Eguerdian jubilatuek, dozena inguru, elkartean bazkaria izan zuten, festari gauean Hostalean ezkonduen afariak amaiera emanez.
