ASTIGARRAGA
San Isidro eguna trikitixa, meza eta idi probarekin ospatuko da gaur
Gainera, Andoni Egaña eta Sebastian Lizaso bertsotan egongo dira Baserritar zaharrei omenaldia Gure Izarra Elkartean ospatuko da
Ohiko idien proba aurten ere ikusi ahal izango da San Isidro egunean. [JUANFER]
ASTIGARRAGA. DV. Gaur San Isidro eguna ospatuko da Astigarragan eta urtero bezala giro ederra sortzea espero da herrian. 9.30etatik aurrera trikitixaren soinuak entzun ahal izango dira Xapre taldearen eskutik.
Goizeko 10:00etan, berriz, meza burutuko da Astigarragako elizan ohiturari helduz. Hamaiketako herrikoia jarraian ospatuko da Gure Izarra Elkartean. Astigarragako baserrietako barazki azoka eta abere erakusketa ere Foruen Enparantzan egongo dira goizean zehar.
Eguerdiko 12:30etan idi proben txanda izango da. Kantabriako Antonio Cotareloren hiru idi eta Errenteriako Patxi Irarretaren lau idi elkarren aurka. Bi probetan 3.200 kiloko harriaz arituko dira idiak. Ondoren, Andoni Egaña eta Sebastian Lizaso bertsolarien saioa izango da. Herriko bazkaria eta baserritar zaharreri omenaldia arratsaldeko 14:30etan hasiko da Gure Izarra Elkartean.
