BREVES-ORDIZIA
Hizketaldian
07.05.08 -
Txalaparta argitaletxearen zuzendari Jose Mari Esparza nafarrak hitzaldia emango du gaur, asteazkena, (maiatzak 7) Ordizian, Hitzaro Euskara Elkarteak eta Ordiziako Udaleko Euskara Zerbitzuak maiatzeko Hizketaldira gonbidatuta. Hitzaldia, ohi denez, 18:30ean hasiko da Barrenako areto nagusian. Urte erdi joan da Esparzak Cien razones por las que dejé de ser español, liburua argitaratu zuenetik, eta seigarren ediziora iritsi da dagoeneko. «Agian, nire bizitzaren sintesi politikoa da liburua. Baina ez da nirea bakarrik: jende anitzek izan ditu bizipen eta sentipen berberak eta horrek azalduko luke liburuak izan duen arrakasta», azaldu du Esparzak. Espainoltasunaren ukazio ariketa da 370 orrialdeko liburua: «Euskal herritar anitz bezala, gu espainol egin gintuzten. Ez genekien gure abizenak euskaldunak zirenik ere. Gure espainolismoa oso ahula zen; egia da. Hala ere, bide luze bat jorratu behar izan dugu zama zaharra kentzeko eta kontzientzia berriari atxikitzeko».
