Gaur Keta eta Touring-en arteko norgehiagoka Orion
03.05.08 -
GETARIA. DV. Getariako Keta Futbol Taldeak gaur arratsaldeko 17:00etan jokatuko du etxean, aurkari zuzen baten aurka: Oreretako Touring taldea. Aurretik, goizean, postua jarriko dute plazan salmenta eta zozketarako.
Touring getariarren puntu berdinekin dago sailkapenean (18 puntu) eta hau dela eta, berebiziko garrantzia izango du gaurko neurketak, garaipena lortzea ezinbestekoa izanik igotzeko aukerekin jarraitzeko eta igoera pixka bat gertuago ikusteko. Igoera fasea amaitzeko 4 partida baino falta ez direnean getariarrak bosgarren postuan kokatuta daude, laugarrenarekin (Touring) puntuetan berdinduta, hirugarrenarengandik 2 puntutara eta bigarrenarengandik hirura. Geratzen diren partidetatik hiru etxean jokatuko dituzte gainera, igoera lortzeko gakoa partida hauek irabaztean egonik
Hori dela eta, beste behin zaletuei dei egiten die taldeak, aste honetan eta falta diren gainerako partidetan, harmailak bete eta taldea anima dezaten. Izan ere, taldearentzat hau pizgarri handia da, aurkari askok ere Orioko Mendibeltz futbol zelaian jokatutako partida guztietan bizitzen den giro aparta nabarmendu izan dutelarik.
