Lagun Onak-eko mendizaleak Tologorri (1.066 m) igo ostean, Orduñan ibili dira
30.04.08 -
AZPEITIA. DV. 14 lagun bildu ziren pasa den asteburuan Lagun Onak MB-koek antolatutako irteeran. Goizeko 8etan atera ziren Orduña (Bizkaia) ondoko Lendoño Goikoa auzorantz. Handik, Tologorri (1.066 m) igotzeko. «Eguraldi bikainarekin ekin genion igoerari. Senda Negra deritzon bidetik gora, pagadi bikain bat atzean utzi eta zeharka gerturatu ginen Tologorrira. Barrerilla delakoa pasa, Iturrigorri iturria ere atzean utzi eta bi ordu baino lehenago ginen tontorrean», esan digute elkartetik.
Atsedenalditxo baten ostean, Ungino (1.094 m) gaina egin zuten, berriro ere, bazkalostean, Lendoñora jaitsi aurretik.
Azpeitira itzuli baino lehen, Orduñan geldiunea egin zuten «ez baita bisitatzeko ohitura daukagun herri horietako bat», esan digute.
