diariovasco.com

..eta ni baino lehen zen atarian. Halaxe gertatu da Zarautzen ere.

Zarauztar guztiok geure etxeetan jaso dugu egunotan 'Zarautz 2018' izeneko aldizkaritxoa, Zarauzko Udalaren izenean bidalia. Bertan erakusten zaizkigu Zarauzko Udalak onartu duen Hirigintza Arauen Plan Orokorraren nondik norakoak. Ez da gure asmoa gaurkoan arau horiei buruzko iritzirik ematea, izango baitugu aurrerago horretarako parada.

Bai, ordea, Jon Urien alkateak sarreran dioenari buruz. Izan ere, kopeta behar da gero 'plan orokor horren ezaugarri berezi bat udal talde politiko guztiek aho batez babestu dutela' esateko!

Gezurretan ari zara, Jon, gezurretan ari zarete PP, PSE, EAJ, EA eta Ezker-Batua-Aralarreko udal taldeak, bai baitakizue ederki asko Ezker Abertzaleko hautetsien Udal Taldeak ez diogula oniritzirik eman plan horri. Udal Taldea baikara gu ere. Askotan entzun dituzue horren aurkako gure argudioak eta proposamenak, baina zuen alderdikeriek eta Madrilgo legeenganako mendekotasunak itsututa jardun duzue hirigintza arauen eztabaidako prozesu guztian zehar.

Gogoratzen al duzue 'herriko eragilez osatutako' Aholku Batzordea eratu zenean zer gertatu zen? Eginahalak eta bi egin zenituzten Ezker Aber-tzaleari atea ixteko, eta lortu zenuten, bai, han gure ahotsik ez entzutea, demokrazia parte hartzailearen kontzeptua hankaz gora botatzea, baina, hala ere, ez zenuten eragotzi gure iritzia plazaratzea, gure proposamenak aurkeztea. Beste urrats bat eman zenuten orduan, guk aurkeztutako proposamenak aintzat ez har-tzea erabaki zenuten. Demokrazia arraroa da zuen hori! Parte hartzea sustatu nahi duzuela diozue, baina parte hartu nahi dugunoi, zilegitasun osoz udaleko bizitza politikoan aritu behar genukeenoi, atea ixten diguzue, behin eta berriz. Eta Alderdien Legearen aurka zaudetela esango duzue gero!