Lan ona egin dute neskek Kantabrian
Nahiz eta 3 partidak galdu maila ona eman dute. [J. ARANBERRI]
USURBIL. DV. Usurbil Kirol Elkarteko jubenil mailako nesken eskubaloi taldeak Espainiako txapelketako zonakako fasea jokatu zuen pasa den asteburuan Kantabria aldean. Fase hau jokatzea sari bat izan da herriko neskentzat, denboraldi borobila burutzen ari baitira eta nahiz eta jokatutako hiru neurketak galdu maila ona eman dute herriko neskek.
Gerora azken fasera sailkatzea lortu duen Ro´Casa Remudas talde kanariarraren aurka jokatu zuten ostiralean lehenengo norgehiagoka eta 17 -28 galdu zuten. Larunbatean, berriz, etxeko taldea izan zuten aurrez aurre, BM Carmargo taldea hain zuzen ere eta 19-32 izan zen azken emaitza kantabriarren alde.
Azkenik, igandean Dos Hermanas Vistazul andaluziako taldearekin neurtu zituzten indarrak eta 27-22 galdu zuten. Hala ere, haintzat hartzekoa da herriko nesken eskubaloi taldeak eginiko lana, herri txiki bateko taldea izanik eta jokalari guztiak usurbildarrak izanik, Espainiako txapelketa jokatzera iritsi baitira Euskadiko bigarren postua lortuta..
Denboraldia oraindik ez da amaitu, ordea, talde honentzat. Kopa txapelketa jokatzen ari dira eta sailkapeneko lehenengo postuan kokatuta daude.
