zarautz
Uraren gaia landuko dute gaztetxoek Agenda 21aren biharko Osoko Bilkuran
ZARAUTZ. DV. Bihar, asteazkena, Eskolako Agenda 21aren inguruko Osoko Bilkura ospatuko da 10.30etatik aurrera udaletxean, eta bertan udaleko ordezkariek eta La Salle, Salbatore Mitxelena ikastola, Antoniano, Mª Inmaculada, Orokieta eta Lizardi ikastetxeko ikasleek hartuko dute parte. Zarauzko ikasleek Eskolako Agenda 21ean burutu beharreko lanak amaitzear dituzte. Ikasle eta irakasleek lan handia egin dute bakoitzaren ur-kontsumoa baloratu, eta ingurmenean eragiten dugun inpaktua aztertzeko. Urak naturan jarraitzen duen zikloa ikusi dute, ur edangarria eskuratzeko eraiki diren azpiegiturak bisitatu dituzte, ikastetxeko eta herriko diagnostikoak egin dituzte; ura eskuratzeko ditugun baliabideen egoera aztertzeko, eta azkenik, kontserbazioaren ikuspegitik Zarauzko erreken egoera nolakoa den baloratu dute.
Lan honen guztiaren azken helburua, uraren kontsumoarekin, ur-azpiegituren egoerarekin eta erreken kontserbazioarekin erlazionaturiko arazoetaz jabetu, eta horiek konpontzeko irtenbideak aurkitzea da.
