zarautz
Areto futboleko taldeak denboraldi bikaina egiten ari dira
Zarautz KE bigarren da, liderrarengandik puntu bakarrera
ZARAUTZ. DV. Beste behin ere emozio handiko eta gol askoko norgehiagoka jokatu zuen Zarautz KEko taldeak. Zarautzen Makax izan genuen bisitari, lehenbiziko itzulian zarauztarrei erraz nagusitu zitzaien talde donostiarra. Zarauztarrek erritmo bizia eman zioten partiduari eta arerioaren zelaian presionatuz baloiaren jabetza herriko taldearena zen. Hala ere, joku estilo hau oso arriskutsua da, eta ondorioz Makax taldeak ere aukera asko sortzen zituen zarauztarren atean. Amaieran, Za-rautz KEkoen kalitatea nagusitu zen, eta azken emaitza 6 eta 4koa izan zen herriko mutilentzat. Emaitza honen ondoren, zarauztarrak sailkapeneko 2. postuan ditugu, liderrarengandik puntu bakar batera. Gainera, ia ia eskuan dute sailkepeneko lehen 4 taldeek jokatuko duten igoera playoferako txartela.
Denboraldi bikaina egiten ari den beste taldea 2A mailako Euromar Kafetegia taldea dugu. Azken asteburuan 3 eta 2 gailendu ziren Mutrikuko Bikinguak taldearen aurka, eta ondorioz igoera playoferako matematikoki sailkatzea lortu dute liga amaitzeko oraindik 2 partidu falta direnean. Euromarrekoak sailkapeneko liderrak dira, eta falta diren 2 partiduetatik bat irabaztea nahikoa dute liga erregularreko txapeldunak izateko.
