GETARIA
Getariarrak Zarauzko plaieroetako finaletan izango dira igande goizean
Aranola Leihoak eta Indaux senior taldeak eta alebin mailako Iturzaeta 6M taldea arituko dira bertan jaian
Senior mutilezkoen Kopako finala jokatuko du Getariako Indaux taldeak.
GETARIA. DV. Igande honetan, apirilaren 20an, Zarauzko 64. Hondartza Futbolteko Txapelketaren finalak jokatuko dira goizeko 10:30etan, getariar hiru talde izango direlarik bertan senior mailako Kopako finalak eta eskolarteko alebin mailako finala jokatzen.
Eskolarteko txapelketari dagokionez, Iturzaeta 6. mailako mutilek alebin mailako finala jokatuko dute 4. zelaian La Salle A taldearen aurka. Kopako senior mailako nesken finala, aldiz, 6. zelaian jokatuko dute Aranola Leihoak getariarrek Talai-Berri Txakolindegiaren aurka. Eta azkenik, senior mutilezkoen Kopako finalean arituko dira Indaux taldeko mutilak Asegroup taldearen aurka 8. zelaian. Guztiek hasi zuten txapelketa urrian, seniorrak urriaren 7an eta eskolartekoak 28an, finalak elkarrekin jokatuko dituztelarik igande honetan goizeko 10:30etatik aurrera.
