'Auzolan bat, Herri bat, Nazio bat' ekimena antolatu da
12.04.08 -
OIARTZUN. DV. Oiartzungo Udalak Bai Euskal Herriari taldearekin elkarlanean antolatu duen 'Auzolan bat, Herri bat, Nazio bat' ekimenaren berri eman nahi du.
Euskal herrialdeen arteko auzolana sustatu asmoz eta errealitate ezberdinen elkartrukea helburu izanik, apirilaren 11tik 19ra bitarte egitarau zabala antolatu dute Oiartzunen Udaleko Kultura Batzordeak eta Bai Euskal Herriari taldeak. Nazioaren garapena eta egituraketa bermatzeko, zonalde eta lurralde ezberdinetako beharrak aintzat hartu eta nazio mailako auzolan eta elkarlan dinamikak sustatzea izan dute ardatz ekimen honen antolaketan. Batez ere, Zuberoako errealitatearen arlo ezberdinak gertutik ezagutu eta elkartrukatzea azpimarratu nahi izan dute antolatzaileek: nekazaritza, kultura, hizkuntza, sozioekonomia etab. Euskal Herrian bizi eta garatzeko, lana biderkatzea funtsezkoa dela iritzi diote eta beraz Euskal Herritik Euskal Herrira begirako ekimena bultzatu nahi dute egitarau honen bidez.
Euskal kultur erakundearen eskaintza aintzat hartuz ipar Euskal Herriko artistekin harremanetan jarri eta ondorioz bai kultura eta bai auzolana uztartzen dituen egitaraua osatzea erabaki zuten Kultura Batzordeak eta Bai Euskal Herriari taldeak datorren astean Oiartzunen.
