Iraultza kulturala aldarrikatuz
10.04.08 -
Ez dok 13 taldeak, 60ko hamarkadan, euskal kantagintzan eta adierazpen artistiko desberdinetan beren kantekin, olerkiekin, filosofiarekin... iraultza kulturala ekarri zuen.
Gaur ezagun eta mitiko bihurtu diren kantari eta olerkari askok (Xabier Letek, Joxan Artzek, Benito Lertxundik, Mikel Laboak, Lurdes Iriondok, Oskarbi taldeak ) lehen urratsak eman zituzten eta bizipoza eman zioten orduko euskal gizarteari. 70eko hamarkadan bereizi eta bakoitzak bere bideari ekin zion beren proiektuetan murgilduz, gaur arte.
Ahaleginik egin izan dute kultur erakundeek beren kideak batzeko, baina alferrik. Euskal Herriko Unibertsitateak bakarrik lortu zuen halakorik egitea, baina ez guztiekin, hiru kiderekin baino ez: Benito Lertxundirekin eta Artze anaiekin. Gerora gauzatu nahi izan diren ekimenak, alde horretatik, hein batean antzuak izan dira.
Oraingoan, Ez dok-badok 13 proiektuaren bidez, garai hartako kultur eragile eta egile asko berreskuratu egingo dituzte. Gainera, ekintza edo jarduera desberdinok herrian gauza daitezen nahi dute, ez eskolan bakarrik, «hain zuzen, ikasten diren kontzeptu, prozedurak eta jarrerak gure egunerokotasunean itxuratu behar direlako, eta non hobeto gure herrian baino. Gizakiak, sortzaile den unetik, ikasitakoa, bereganatutakoa, jendaurrean sentituz gogotzen duenean, antzaldatze, eraldatze bat gertatzen da beregan», diote.
