ANTZUOLA
Gainezkabidera urik ez da sartu errekak gora egin arren
10.04.08 -
ANTZUOLA. DV. Pazko Astean euri asko egin arren, errekako urik ez zen sartu Herriko Plazako gainezkabidean. Haren premiarik ez da izan oraindik. Errekaren gorakada gertutik ikusi zutenek diotenez, «ur maila gainezkabidetik hogeita bost edo hogeita hamar zentimetro beherago geratu zen. Artean ere ur asko behar zen hara sartzen hasteko».
Herriko Plaza jaso eta erreka bistan laga denean, udaletxe eta haren ondoko etxe ilararen atzeko aldean gainezkabidea eraiki zen, noizbait urak gainezka egiteko arriskua saihesteko. Ez zen, egia esan, kolpeko zaparradarik izan, eten gutxikoa baizik.
Diotenez, errekan behera ura «azkarrago joaten da Herriko Plazako obrak egin eta Errota Berri pareko ur jauzia txikitu eta gero. Eta bizkorrago joateak ere laguntzen du ur mailak gorago ez igotzeko».
Momentuz, beraz, gainezkabidearen premiarik ez da izan eta beste euriteren bat etorri beharko da handik errekako uraren zati bat bideratu dadin.
