GETARIA
Zarauzko plaieroetako finalerdiak gainditu dituzte getariar taldeek
Finalak apirilaren 20an jokatuko dituzte denek goizeko 10:30etan
09.04.08 -
GETARIA. DV. Zarauzko 64. Hondartza Futboleko Txapelketako finalerdiak jokatu dituzten hiru getariar taldeek, bi senior mailakoak eta bestea alebin mailakoa, pausu hau gainditu eta finalerako sailkatu dira iragan igandean jokatutako partiduak irabaztean. Horrela, Indaux eta Aranola Leihoak taldeek Kopako finala jokatuko dute apirilaren 20an eta Iturzaeta 6M taldeak, berriz, eskolarteko alebin mailako finala jokatuko du egun berean, partidu denak goizeko 10:30etan izanik.
Finalerdiak igandean jokatu zituzten denek Zarauzko hondartzan. Eskolarteko txapelketan Iturzaeta 6 mutilen taldea Zuk Dakizu taldearen aurka aritu zen norgehiagokan, 5 eta 2 gailenduz. Senior mailan, berriz, senior mutilezkoen Indaux taldeak 5 eta 1 irabazi zuen ARG taldearen aurkako partidua, eta senior emakumezkoen Kopako finalerdietan Aranola Leihoak-Ecoven Plus eta Kiribil Estilistak-The Balde taldeen arteko norgehiagoka 3 eta 5eko emaitzarekin amaitu zen getariarren alde.
