Tolosa Aralarrek taularen erdian dago
05.04.08 -
TOLOSA. DV. Hirugarren garaipena jarraian lortu zuen Tolosa Aralar-ek pasa den larunbatean Usabalen. Hasiera oso hotza izan zen. Horrela, etxekoek 6 puntu erdietsi zituzten lehen lau minutuetan. Aurkariak, ordea, ez zuen saskiratzerik lortu. Hemendik laurden amaierara gauzak erabat aldatu ziren eta bilbotarrak izan ziren saskia zulatzea lortu zuten bakarrak. Bigarren laurdenean gauzak ez ziren asko aldatu. Erasoan finago ibili ziren bi taldeak, atsedenaldira bost puntuko errenta kezkagarriarekin iritsiz (21 eta 26). Jaitsiera ekiditeko aurkari zuzena zela kontutan hartuta, gauzek ezin zuten horrela jarraitu, eta atsedenaldian erasoaren alde apustu egitea erabaki zen. Izan ere, hirugarren laurdenean, etxekoengan ohikoak ez diren 29 puntu lortu ziren eta azkenekoan, 22. Erasoko festa beraz, Usabalen, Goar-en inspirazioan lagunduta. Jaitsierako laugarren postua aldentzeko borrokan bost talde daude berdinduta eta horien artean aurkitzen da Tolosa Aralar.
Gaur Lizarran jokatuko dute tolosarrek arratsaldeko 17:30etan Promociones Legarzia taldearen aurka.
