SEGURA
Iparra-Hegoa kultur jardunaldiak ari dira ospatzen aste honetan
SEGURA. DV. Iparra-Hegoa kultur jardunaldien 13. edizioa ari da ospatzen aste honetan. Elorri elkarteak antolatzen dituen ekitaldiak itsasoari eskainitakoak izango dira aurten eta egunotan hainbat hitzaldi ari dira izaten. Gaur, asteazkena, arratsaldeko 19.30etan, Kultur etxean, portua eta aisialdiari buruz hitz egingo dute Senpereko Amaiur Alfaro eta Lekeitioko itsas elkarteko kideek.
Bihar bertso afaria izango da Jon Maia eta Amets Arzallusekin, eta ostiralean Segura eta Iparraldeko haurren arteko ekintzek bereganatuko dute protagonismoa. Larunbatean margo lehiaketa, mus txapelketaren finala eta dantzaldia izango dira, besteak beste. Igandean azoka, dantzariak, gereziondoko ekitaldia, txakolin dastatzea eta bazkariarekin emango zaio amaiera aurtengo Iparra-Hegoari.
