AL DÍA
'Bikain' euskararen kalitate ziurtagiria eskatzeko epea, zabalik
06.03.08 -
DONOSTIA.DV. Gaur hasi eta hilaren 31ra bitartean eska dezakete Bikain izeneko Euskararen Kalitate Ziurtagiri Publikoa eskuratu nahi duten enpresa eta erakundeek hori lortzeko ezinbestekoa den ebaluazioa.
Patxi Baztarrika Hizkuntz Politikarako sailburuordeak ziurtagiri «publiko, ofizial eta doako» horren prozedura aurkeztean adierazi zuenez, euskararen «presentzia, erabilera eta kudeaketa egiaztatuko» ditu hiru mailatan emango den agirian.
Ziurtagiria kudeatzeaz Euskalit arduratuko da, eta kanpoko talde ebaluatzaile batek aztertuko du zein neurritan betetzen dituzten hautagaiek Erreferentzia Marko Estandarra delakoak 18 alorretan finkatzen dituen baldintzak, 2007 urtean bederatzi enpresa pilotutan egiaztatu zen sistemaren arabera. Eskabideak honako web gunean egin behar dira: www.euskalit.net/bikain.
