arrasate-mondragon
Gurasoentzako aholkuen liburuxka eta kantu eta jolasen DVDa banatuko dute
DVD horren helburua gurasoei umeekin euskaraz jolasteko aukera eskaintzea da
ARRASATE. DV. Umeen hizkuntzaren ikasketak eta familia transmisioak duten garrantzia aintzat harturik, Debagoieneko udaletako euskara zerbitzuek eta Mankomunitateak, gurasoentzako aholkuen liburuxka eta kantu eta jolasen DVDa banatuko dute. Sorta hori bailarako 4 urteko ume eta gurasoek jasoko dute.
2006 urtean ekimena abiatu zenetik, 4.000 sorta banatu dira ikastetxeetan eta herrietako aisialdi taldeetan, 4-8 urteko haurren artean. DVD horren helburua gurasoei umeekin euskaraz jolasteko aukera eskaintzea da. Normalean, gaur egun, adin horretako umeek dituzten gurasoek, nahiz eta euskaldunak izan, jolas eta abesti gehiago ezagutzen dituzte gaztelaniaz, eta gabezia horri aurre egiteko aukera eskaini ahal izateko egin dugu DVDa. Abestiak laburrak direnez, guraso erdaldunek ere ez dute zailtasun handirik izango ikasteko. Kaxa barruan bi liburuxka daude, DVDaz gain. Liburuxka bat grabazioan jasota dauden jolas eta kantuen gaineko informazioarekin osatu da. Bestea, aldiz, Biharko euskara gaur-Su futuro euskara desde hoy, espresuki gurasoei bideratutako liburuxka da: hizkuntzarekin lotutako aholkuak jaso dira, elebitan. Seme-alabekin gozatzeko eta jolas egiteko urteak dira, eta horretan laguntzeko banatuko dute euskara zerbitzuek aipatutako materiala.
